‘भूतप्रेत भइसकेको तानाशाही राजतन्त्र अब फर्किएर आउन्न’

प्रधानमन्त्री केपी ओलीले जनताको संघर्षबाट भूतप्रेत भइसकेको तानाशाही राजतन्त्र अब कहिल्यै फर्किएर नआउने बताएका छन् ।

राष्ट्रिय जनसांस्कृतिक महासंघ नेपालको नवौं राष्ट्रिय महाधिवेशनको आज (बुधबार) उद्घाटन गर्दै नेकपा एमालेका अध्यक्षसमेत रहेका ओलीले गणतन्त्र आइसक्दा पनि स्वतन्त्र हुन नचाहेर रैती नै हुन पाउँ भन्ने मूर्खहरुको डफ्फाले व्यवस्थाको विरोध गर्ने र जेमा पनि नकारात्मकता देख्ने गरेको उल्लेख गरे । उनले जनताको समृद्धि, स्वतन्त्रता र शान्तिका लागि आफ्नो सिर्जनात्मक अभियानलाई तीव्रता दिन आग्रह गरे । ‘रातिमा चारवटा स्याल कराउँदा वनै झन्किएजस्तो हुन्छ । तिनले कराएर केही हुन्न । अब राजा हुने सपना कसैले देख्छ भने त्यो सपना मात्रै हुनेछ,’ उनले भने, ‘त्यस्ता प्रवृत्तिविरुद्ध सशक्त रूपमा  सांस्कृतिक ढ्यांग्रो बजाउनुपरेको छ । यो काममा तपाईंहरु लाग्नुहोला ।’

राजतन्त्र अब फर्कन्न भन्ने कलाकार सुरक्षा पन्तको फिल्म बहिष्कार गर्छु भन्नेहरुलाई सचेत गर्दै प्रधानमन्त्री ओलीले देश र जनताको पक्षमा राम्रा फिल्म र नाटक बनाउँदा हेर्ने दर्शकको कुनै कमी नहुने स्पष्ट गरे ।