शिक्षक महासंघ र सरकारबीच भएको सहमतिप्रति असन्तुष्टि जनाउँदै नेपाल विद्यालय कर्मचारी परिषदले चरणबद्ध आन्दोलनको घोषणा गरेको छ ।
विद्यालय कर्मचारी परिषद्ले शुक्रबार काठमाडौंमा पत्रकार सम्मेलन गर्दै आन्दोलनको घोषणा गरेको हो । जसअनुसार वैशाख २१ गतेदेखि जेठ ३ गतेसम्म कालोपट्टी बाँधेर कार्यक्षेत्रमा काम गर्ने, जेठ ४ गते सबै स्थानीय तहमा ध्यानाकर्षण पत्र बुझाउँदै आन्दोलनबारे जानकारी गराउने र जेठ ५ गते जिल्लागत आन्दोलन परिचालन समिति गठन गर्ने परिषद्ले जनाएको छ ।
त्यस्तै जेठ ६ गते शिक्षा बिकास तथा समन्वय एकाइमा ध्यानाकर्षण पत्र बुझाउने, जेठ ७ गते सातवटै प्रदेशमा ध्यानाकर्षण पत्र बुझाउने र जेठ ९ र १० गते काठमाडौंमा सडक आन्दोलन गर्ने परिषद्ले जानकारी दिएको छ ।
यो समयभित्र आफ्ना माग पूरा नभए दोस्रो चरणको आन्दोलनको घोषणा गर्ने परिषद्का अध्यक्ष गंगाराम तिवारीले जानकारी दिए । उनले विद्यालय कर्मचारीको मागलाई पूर्णरुपमा बेवास्ता गर्दै शिक्षकहरुले आफ्ना माग मात्रै पूरा हुने गरी सहमति गरेकाले असन्तुष्टि रहेको उल्लेख गरे ।
