काठमाडौं, असार १३ :
नेपाल २९औं एसियाली युथ टेबलटेनिस च्याम्पियनसिपको यू-१९ ब्वाइज टिम इभेन्टमा प्रिक्वाटरफाइनलमा प्रवेश गरेको छ ।
उज्वेकिस्तानको तास्केन्दमा जारी प्रतियोगिताको ग्रुप १ को खेलमा नेपालले साउदी अरेबियालाई ३-१ ले पराजित गर्दै प्रिक्वाटरफाइनलमा पुग्न सफल भयो ।
३ अंक बटुलेको नेपाल समूह उपविजेता हुँदै प्रिक्वाटरफाइनलमा पुगेको टोली प्रमुख ज्याकी महर्जनले जनाएका छन् ।
नेपालबाट पुरुषमा प्रवेश बस्नेत, हिमाल विष्ट र धनञ्जय दाहाल सहभागी छन् । नेपालको समूहमा भारत र साउदी अरेबिया छन् । नेपाल र साउदीलाई हराएको भारत समूह विजेता बन्दै प्रिक्वाटरफाइनलमा पुग्यो ।
प्रिक्वाटरफाइनलमा नेपालले मलेसियाको सामना गर्नेछ । टोली प्रमुख महर्जन र प्रशिक्षक मोहनदास बासुकलाले नेपाली टेबलटेनिसको इतिहासमा यो सफलता ऐतिहासिक भएको बताए ।
