काठमाडौं, असार २५ :
काठमाडौं महानगरपालिकाका तत्कालीन प्रमुख प्रशासकीय अधिकृत प्रदीप परियारलाई २५ हजार रुपैयाँ धरौटीमा रिहा गर्न विशेष अदालतले आदेश दिएको छ।
विशेष अदालतका न्यायाधीश तेज नारायण सिंह राई, रामबहादुर थापा र रितेन्द्र थापाको इजलासले बुधबार परियारलाई धरौटीमा रिहा गर्न आदेश दिएको हो।
उनीसँगै मुद्दामा संलग्न महानगरका तत्कालीन निर्देशकहरू बसन्त आचार्य र नमराज ढकाललाई पनि जनही ५० हजार धरौटीमा रिहा गर्ने आदेश दिएको छ।
अख्तियार दुरुपयोग अनुसन्धान आयोगले गत जेठ २८ गते प्रदीप परियारसहित ७ जनाविरुद्ध भ्रष्टाचार मुद्दा दायर गरेको थियो। सामाखुसी करिडोरअन्तर्गत बसुन्धरादेखि म्हेपीसम्मको ढल निर्माण ठेक्कामा अनियमितता भएको आरोपमा परियारविरुद्ध मुद्दा दायर भएको थियो ।
