राष्ट्रिय सभामा नेकपा (माओवादी केन्द्र) का सांसद जगप्रसाद शर्माले देश झनै गरिबीको खाडलमा गइरहेको बताएका छन् ।
राष्ट्रिय सभाको मंगलबारको बैठकमा बोल्दै उनले देशमा गरिबी झनै बढिरहेको, खाद्य संकट र बेरोजगारी पनि दिन प्रतिदिन बढिरहेको जिकिर गरे ।
उनले पुँजीगत खर्च हुन नसकेको र आयात बढिरहेको बताए । निर्यात दिनदिनै कम भइरहेको बताए । ऋणको भार थेग्न गाह्रो हुने स्थितिमा देश अघि बढिरहेको बताए । कुनै महिना एक अर्ब राजश्व बढी उठ्दैमा त्यसलाई आत्मरतिको विषय बनाएर प्रचार गरे पनि देश बन्न नसक्ने बताए ।
सांसद शर्माले भन्नुभयो, ‘हामीले डाटा, तथ्य, तथ्यांकमा हेर्यौं भने धनी र गरिबको खाडल झन्-झन् गहिरिरहेको छ । वा बढिरहेको छ । त्यो हामीले देखिरहेका छौं । खाद्य संकट पनि बढिरहेको छ । बेरोजगारी पनि बढिरहेको छ । ’ सांसद शर्माले देश बनाउने कुरालाई केन्द्रबिन्दुमा राखेर अघि बढ्न जरुरी रहेको बताए ।
