नेकपा माओवादीले आन्तरिक एकतालाई सुदृढ गर्न स्थायी कमिटी बैठकमा छलफल गर्ने एजेन्डा तयार पारेको छ ।
पार्टी केन्द्रीय कार्यालय पेरिसडाँडामा बुधबार बसेको केन्द्रको पदाधिकारी बैठकले पार्टीको आन्तरिक एकतामा फरकफरक धारणा सार्वजनिक भएको उल्लेख गर्दै पार्टीमा सुदृढ एकताका लागि स्थायी कमिटीमा छलफल गर्ने निर्णय गरेको हो ।
साउन १६ गतेदेखि बस्ने स्थायी कमिटी बैठकमा पार्टीको आन्तरिक एकता बलियो पार्दै आगामी महाधिवेशनको मिति तय गर्ने विषय र विचार मिल्ने दलहरूसँग पार्टी एकता गर्ने बैठकले निर्णय गरेको सचिव लिलामणि पोखरेलले बताए ।
पदाधिकारी बैठकमा अध्यक्ष पुष्पकमल दाहाल प्रचण्ड र उपमहासचिव जनार्दन शर्माबीचको विवादको विषयले प्रवेश पाए पनि शर्माले सार्वजनिक गरेका टिप्पणीबारे भने बुँदागत रुपमा छलफल भएन ।
यसैबीच स्थायी कमिटीलगत्तै केन्द्रीय कमिटीको बैठक पनि बस्ने भएको छ । स्थायी कमिटी बैठकमा अध्यक्ष प्रचण्डले समसामयिक परिस्थितिको ब्रिफिङ गर्ने प्रवक्ता अग्नि सापकोटाले जानकारी दिए ।
