काठमाडौं, असोज १ :
अन्तरिम सरकारका तीन मन्त्रीले जेनजी आन्दोलनमा क्षतिग्रस्त बनेको संसद् भवनको अवलोकन गरेका छन्। गृहमन्त्री ओमप्रकाश अर्याल, अर्थमन्त्री रामेश्वर खनाल र ऊर्जा मन्त्री कुलमान घिसिङ बुधबार संयुक्त रूपमा संसद् भवन पुगेर आगजनी र तोडफोडका कारण पुगेको क्षतिको स्थलगत निरीक्षण गरेका हुन्।
भदौ २३ मा जेन–जीको नेतृत्वमा गरिएको आन्दोलन र त्यसपछि भदौ २४ मा आयोजित प्रदर्शनका क्रममा संसद् भवनमा व्यापक तोडफोड र आगजनी भएको थियो। यस घटनापछि भवन अत्यन्तै क्षतिग्रस्त अवस्थामा पुगेको छ।
मन्त्रीहरूले भवनको संरचनात्मक अवस्था, सुरक्षाको अवस्थिति र सम्भावित पुनःनिर्माणको आवश्यकताबारे प्रारम्भिक जानकारी लिएको जनाइएको छ। उनीहरूले अवलोकनपछि सुरक्षा व्यवस्थाको सुदृढीकरण र पुनःनिर्माणका लागि सरकार गम्भीर रहेको बताएका छन्।
