काठमाडौं, असोज १६ :
दुई दिनदेखि सुनसान देखिएको काठमाडौं उपत्यकाको सडकहरूमा आज टीका लगाउन निस्किएका सर्वसाधारणका कारण पुनः चहलपहल बढेको छ।
विजया दशमीको मुख्य दिन, टीका प्रसाद ग्रहण गर्न नातागोता र आफन्तकहाँ जाने क्रम सुरु भएसँगै राजधानीका सडकहरूमा सवारीसाधन र मानिसको आवागमनमा वृद्धि देखिएको छ ।
बडादसैँ मनाउन राजधानीबाट धेरै नागरिक आफ्ना गाउँघर फर्किएपछि काठमाडौं केही सुनसान देखिएको थियो। यद्यपि, टीकाको दिन पारिवारिक भेटघाट, आशिर्वाद ग्रहण र सामाजिक मेलमिलापका लागि मानिसहरू बाहिर निस्किन थालेपछि सडकमा बढेको हो।
मोटरसाइकल, ट्याक्सी र निजी सवारीसाधनमार्फत मानिसहरू टीका लगाउन गन्तव्यतर्फ जाँदै गरेका छन्।
ट्राफिक प्रहरी महाशाखाका अनुसार दशैंका बेला उपत्यकाभित्र सवारी चाप कम हुने गरे पनि टीका लगाउने दिन दिउँसो र बेलुकी चाप बढ्ने गरेको छ।
