फाइल तस्बिर ।
काग तिहारको अवसर पारेर राजधानीको नारायणहिटी दरबार सङ्ग्रहालयअगाडि २२औँ ‘काग सम्मेलन’ सम्पन्न गरिएको छ। कलाकार रमेश दुलाल ‘कागे’ले विगत झैँ यसपटक पनि आफ्नो अनौठो कलामार्फत कार्यक्रमलाई विशेष बनाए।
उनले भने, ‘कागलाई यमराजको दूत मानिन्छ। त्यसैले काग तिहारको दिनलाई विशेष बनाउन २२ वर्षदेखि यो सम्मेलन गर्दै आएको हुँ। यसपटक भने कुनै सामाजिक सन्देश होइन, शुद्ध सांस्कृतिक उद्देश्यले कार्यक्रम गरेको हुँ।’
विगतमा उनले रत्नपार्कको शान्ति बाटिका, त्रिभुवन विमानस्थल क्षेत्रजस्ता स्थानमा ‘काग सम्मेलन’ गर्दै आएका थिए।
दुलाल जनावर र चराचुरुङ्गीका आवाज नक्कल गर्ने कलाकारका रूपमा परिचित छन्। उनले कागसहित १७३ प्रकारका जीवजन्तु र चरा चिच्याहटको आवाज निकाल्न सक्छन्। त्यतिमात्र होइन, उनी मुखकै सहायताले मादल, सनाई, सारङ्गी, पियानो, ड्रम सेट, मुर्चुङ्गा र गितारजस्ता बाजाका धुन पनि सजीव रूपमा उतार्न सक्छन्।
कला र संस्कृति संरक्षणतर्फ सचेत गराउने उद्देश्यसहित गरिएको कार्यक्रमको उपस्थित दर्शकहरूले प्रशंसा गरेका छन्।
