मधेश प्रदेशका मुख्यमन्त्री जितेन्द्र प्रसाद सोनलले छठ पर्वपछि विश्वासको मत लिने तयारी गरेका छन्। गत असोज २९ गते मुख्यमन्त्री नियुक्त भएका सोनलले संवैधानिक प्रावधानअनुसार नियुक्ति भएको ३० दिनभित्र विश्वासको मत लिनुपर्नेछ।
मुख्यमन्त्री सोनलले चाडपर्वको कारण तत्काल बैठक बोलाउन नसकिएको बताउँदै छठ पर्व सम्पन्न भएपछि विश्वासको मत लिने तयारी गरिएको जानकारी दिएका छन्।
सोनल जनता समाजवादी पार्टी (जसपा) नेपालका तर्फबाट मुख्यमन्त्री बनेका हुन्। उनको सरकार जनमत पार्टी, नेकपा माओवादी केन्द्र, लोकतान्त्रिक समाजवादी पार्टी (लोसपा) नेपाल र नेकपा (एकीकृत समाजवादी) को समर्थनमा बनेको हो।
प्रदेश सभामा यी पाँच दलका जम्मा ५७ जना सांसद छन्। जसमा जसपा नेपालका १९, जनमत पार्टीका १३, माओवादी केन्द्रका ९, लोसपाका ९ र नेकपा (एकीकृत समाजवादी) का ७ जना सांसद छन्।
१०७ सदस्यीय मधेश प्रदेश सभामा सरकार गठनका लागि ५४ सांसदको समर्थन आवश्यक हुन्छ। गठबन्धनसँग ५७ सांसदको बहुमत भएकाले मुख्यमन्त्री सोनलले सहजै विश्वासको मत पाउने अपेक्षा गरिएको छ।
यो पनि…
मधेश प्रदेश सरकार विस्तारबारे सत्तापक्षीय पाँच दलको बैठक बस्दै
