मेडिकल व्यवसायी दुर्गा प्रसाईंले काठमाडौं महानगरपालिकाका मेयर बालेन्द्र शाह (बालेन) विरुद्ध अभियान सुरु गर्ने घोषणा गरेका छन्।
आइतबार बिहान उनी मनोहरास्थित सुकुम्बासी बस्ती पुगेका थिए, जहाँ उनले बालेनविरुद्ध लड्न सुकुम्बासीलाई उक्साउँदै सहयोग गर्ने प्रतिबद्धता जनाए।
मनोहरामा भेला भएका बस्तीवासीलाइ सम्बोधन गर्दै प्रसाईंले मङ्सिर ७ गतेदेखि सुरु हुने आफ्नो अभियानमा साथ दिन आग्रह गरे। उनले भने, ‘सुकुम्बासीलाई लछारपछार गर्नेहरूको श्रीमती र परिवारलाई पनि त्यस्तै गर्छु।’
प्रसाईंले मेयर बालेन र उनका सहयोगी भिक्टर पौडेलमाथि पनि गम्भीर आरोप लगाउँदै भने, ‘बालेनसँग मिलेर भिक्टर पौडेलले बब्लु गुप्तालाई मन्त्री बनाउन दुई करोड खाएका छन्।’
दलहरूले सुकुम्बासीलाई केवल ‘भोट बैंक’का रूपमा प्रयोग गर्दै आएको आरोप लगाउँदै उनले भने, “म भोट माग्दिनँ, बरु सबैलाई पक्की घर दिलाउन मद्दत गर्छु।’
प्रसाईंले सम्पूर्ण दल र बालेन शाहलाई “ठेगान लगाउने” चेतावनीसमेत दिए।
यता, काठमाडौं महानगरले मनोहरा सुकुम्बासी बस्ती खाली गर्न दिएको एक हप्ताको अल्टिमेटम आइतबार सकिँदैछ। अल्टिमेटम सकिएसँगै महानगरले बस्ती खाली गराउने तयारी गरेको छ।
