कागेश्वरी मनोहरा नगरपालिकाको वडा नं. ४ थलीस्थित सिंखडा गाउँमा रहेको एक गाईगोठमा बुधबार साँझ आगलागी भएको छ।
विश्व सिंखडाको घरसँगै जोडिएको गाईगोठमा अचानक आगलागी भएको हो। आगलागीको सूचना प्राप्त हुनासाथ नेपाली सेना, नगरपालिकाको दमकल, नगर प्रहरी तथा स्थानीयवासीको सक्रिय सहभागितामा आगो तत्काल नियन्त्रणमा लिइएको प्रहरीले जनाएको छ।
आगलागीका क्रममा निस्किएको धुवाँका कारण छिमेकका दुई जना व्यक्ति बेहोस भए पनि उनीहरूलाई तत्काल उद्धार गरी अस्पताल पठाइएको थियो। हाल उनीहरूको अवस्था खतरा मुक्त रहेको बताइएको छ।
समयमै आगो निभाइएकाले मानवीय तथा ठूलो भौतिक क्षति हुन नपाएको प्रहरीले जनाएको छ। नगरपालिकामा दमकल उपलब्ध भएकाले आगलागी नियन्त्रणमा उल्लेखनीय सहयोग पुगेको र नगर प्रहरीलाई समयमै प्रदान गरिएको तालिमका कारण उद्धार तथा नियन्त्रण कार्य कुशलतापूर्वक सम्पन्न भएको जनाइएको छ।
नगरपालिकाले दुई महिनाअघि जापान सरकारबाट सहयोगस्वरूप प्राप्त गरेको अत्याधुनिक दमकल यस्ता घटनाका लागि वरदान सावित भएको नगरपालिकाले जनाएको छ।
