नेपाली कांग्रेसले संविधान संशोधनसम्बन्धी बहसपत्र तयार पार्ने कार्यदलमा सहभागी हुनुअघि चार विषयमा प्रष्टता माग गरेको छ।
कांग्रेसका कार्यवाहक मुख्यसचिव कृष्णप्रसाद दुलालले विज्ञप्ति जारी गर्दै कार्यदलको विधि, कार्यक्षेत्र, राजनीतिक उद्देश्य र सरकारको प्रतिबद्धताबारे स्पष्ट नभएसम्म सहभागी नहुने जनाएका छन्।
कांग्रेसले कार्यदलको अधिकार क्षेत्र र भूमिका अस्पष्ट रहेको, संविधान संशोधन जस्तो संवेदनशील विषयलाई सहभागितामूलक र समावेशी बनाउन सरकारको धारणा प्रष्ट हुनुपर्ने, संसदबाहिरका दल तथा विभिन्न पहिचानमुखी समुदायलाई कसरी समेटिन्छ भन्ने स्पष्ट हुनुपर्ने र सरकार तथा नेतृत्वकर्ता दलको संविधानप्रति प्रतिबद्धता खुलाउनुपर्ने माग राखेको छ।
संविधान संशोधनलाई लोकतान्त्रिक प्रक्रिया मान्दै कांग्रेसले आवश्यक परिमार्जनका लागि सहयोग गर्ने जनाएको छ। साथै, व्यापक छलफल र सहमतिका आधारमा मात्र संशोधन अघि बढाउनुपर्नेमा जोड दिएको छ।
