जगत्गुरु शङ्कराचार्य श्री श्री विधुशेखर भारती महास्वामीले काठमाडौं इन्स्टिच्युट अफ चाइल्ड हेल्थ (किओच) अन्तर्गत निर्माण गरिएको बाल अस्पताल भवनको उद्घाटन गरेका छन्। बुढानीलकण्ठ नगरपालिका–७, हेपाली हाइटस्थित अस्पताल परिसरमा आयोजित विशेष समारोहबीच भवन समुद्घाटन गरिएको हो।
उक्त भवन समाजसेवी मीनबहादुर गुरुङ र सावित्री गुरुङ तथा पहलमान गुरुङ र सरला गुरुङको सहयोगमा निर्माण गरिएको हो। व्यवसायी मीनबहादुर गुरुङको स्वामित्वमा रहेको भाटभटेनी सुपरमार्केटले भवन निर्माणका लागि रु ७१ करोड ४ लाख ४२ हजार २४४ खर्च गरेको जनाएको छ।
समारोहमा बोल्दै पूर्वप्रधानन्यायाधीश सुशीला कार्कीले अस्पताल स्थापनाले गरिब तथा विपन्न बालबालिकाले सर्वसुलभ स्वास्थ्य सेवा पाउने वातावरण सिर्जना भएको बताइन्।
अस्पतालका अध्यक्ष एवं वरिष्ठ मुटुरोग विशेषज्ञ प्राडा भगवान कोइरालाले किओच गैरनाफामूलक संस्थाका रूपमा सञ्चालन भइरहेको उल्लेख गर्दै बालबालिकालाई विशिष्टीकृत स्वास्थ्य सेवा उपलब्ध गराउने उद्देश्य रहेको बताए।
व्यवसायी मीनबहादुर गुरुङले सर्वसाधारण नागरिकलाई गुणस्तरीय र सहज स्वास्थ्य सेवा उपलब्ध गराउने लक्ष्यसहित अस्पताल स्थापना गरिएको जानकारी दिए।
काठमाडौँ इन्स्टिच्युट अफ चाइल्ड हेल्थ गैरनाफामूलक कम्पनीका रूपमा दर्ता भई समाज कल्याण परिषद्मा आबद्ध सामाजिक संस्थाका रूपमा सञ्चालनमा रहेको छ। संस्थाले काठमाडौं उपत्यकामा विशिष्टीकृत बाल अस्पताल सञ्चालन गर्नुका साथै सातै प्रदेशमा बाल अस्पताल सञ्जाल विस्तार गर्ने योजना अघि बढाइरहेको जनाएको छ।
देशभरका बालबालिकालाई गुणस्तरीय स्वास्थ्य सेवा पहुँचमा पुर्याई शिशु तथा बाल मृत्युदर घटाउने उद्देश्यसहित अस्पताल स्थापना गरिएको संस्थाले जनाएको छ।
र यो पनि…
