कीर्तिपुरस्थित राधास्वामी सत्संग केन्द्रमा आश्रय लिइरहेका एक सुकुम्वासी युवकको मृत्यु भएको छ । ३६ वर्षीय भेषराज दर्जी नाम गरेका ती सुकुम्वासी युवकको वीर अस्पतालमा उपचारका क्रममा आज मृत्यु भएको हो । तीनकुने गैरीगाउँ क्षेत्रबाट विस्थापित भएका उनलाई कीर्तिपुरस्थित राधास्वामी सत्संगमा लगेर राखिएको थियो ।
अस्पतालकाअनुसार उनी वैशाख १८ गते साँझ ७:१५ बजे भर्ना भएका थिए। उनलाई भेन्टिलेटरमा राखेर उपचार गरिएको थियो। यसअघि सुकुम्वासी बस्तीका दुई जनाले आत्महत्या गरेका थिए। वर्षौंदेखि बस्दै आएको घर भत्काएको वेदना सहन नसकेर उनीहरुले आत्महत्या गरेका थिए ।
सरकारले आफूहरुलाई व्यवस्थापन नगरेर यातना दिएको विस्थापितहरुको गुनासो छ । यो गर्मी मौसममा सबै जना एकै ठाउँमा कोच्चिएर बस्नु पर्दा उनीहरुलाई ज्यादै सकस भएको छ । गर्मीकै कारण रातभर सुत्न सक्ने अवस्था नभएको पनि उनीहरु बताउँछन् ।
