मलमासको अन्तिम सोमबारे औँसी, देवघाटधाममा स्नान तथा पूजाआजा गर्नेको घुँइचो

चितवन, नवलपुर र तनहुँ जिल्लाको संगमस्थल तथा प्रसिद्ध धार्मिक तीर्थस्थल देवघाटधाममा मलमासको अन्तिम सोमबारे औँसीका अवसरमा स्नान तथा पूजाआजा गर्ने श्रद्धालुको उल्लेख्य घुँइचो लागेको छ ।

सोमबारे औँसी तथा मलमासको अन्तिम दिन पवित्र स्नान गर्न देशका विभिन्न स्थानबाट भक्तजन देवघाटधाम पुगेका थिए । त्रिशूली र कालीगण्डकी नदीको संगमस्थलमा स्नान गरी श्रद्धालुले पूजा, आराधना, दान तथा धार्मिक अनुष्ठान गरेका छन् ।

धार्मिक विश्वासअनुसार सोमबारे औँसीका दिन देवघाटमा स्नान तथा पूजाआजा गर्दा पुण्य प्राप्त हुने मान्यता रहेकाले हरेक वर्ष यस अवसरमा भक्तजनको उल्लेख्य उपस्थिति रहने गर्दछ । यस वर्ष पनि चितवन, नवलपुर, तनहुँसहित आसपासका जिल्लाबाट हजारौं श्रद्धालु देवघाट पुगेका छन् ।

श्रद्धालुको चापलाई मध्यनजर गर्दै सुरक्षा व्यवस्थासमेत कडा पारिएको छ। स्थानीय प्रशासन, सुरक्षाकर्मी तथा विभिन्न संघसंस्थाले तीर्थयात्रीको सहजताका लागि आवश्यक व्यवस्थापन गरेका छन् ।

मलमासको अन्तिम दिन देवघाटधाममा भक्तजनको भरिभराउ भएको छ भने धार्मिक गतिविधिले क्षेत्रको वातावरण थप भक्तिमय बनेको छ ।