राष्ट्रिय स्वतन्त्र पार्टी (रास्वपा) का सभापति रवि लामिछानेको थुनछेक बहस हेर्दाहेर्दैमा राखिएको छ ।
आजको बहस नसकिएपछि मुद्दा आइतबारका लागि हेर्दाहेर्दैमा राखिएको हो । बुटवलको सुप्रिम सहकारी ठगी प्रकरणको बयानका लागि लामिछाने गत बुधबार रुपन्देही जिल्ला अदालतमा उपस्थित भएका थिए । मुद्दाको बहस बुधबारबाट रुपन्देही जिल्ला अदालतमा न्यायाधीश प्रह्लादकुमार योगीको इजलासमा भइरहेको छ ।
बुधबार दिनभर बहस भएपछि बिहीबारबाट भने न्यायाधीश योगीको इजलासमा थुनछेक बहस भइरहेको छ । बिहीबार ८ जना सरकारी वकिलहरूले बहस गरेका थिए ।
आज (शुक्रबार) सुरुमा जाहेरवालाका तर्फबाट वकिलहरूको बहस भएको थियो । त्यसपछि प्रतिवादीका तर्फबाट वरिष्ठ अधिवक्ताहरू सुशील पन्त र सुरेन्द्र थापाले बहस गरेका थिए । बहस नसकिएपछि आइतबार पुनः अदालतमा उपस्थित हुने सर्तमा लामिछानेलाई परिवारको जिम्मा लगाइएको छ ।
