काठमाडौं, फागुन ५ :
कीर्तिपुर अस्पतालले उपप्रधानमन्त्री विष्णुप्रसाद पौडेल र पोखरा महानगरपालिका प्रमुख धनराज आचार्यसँगको भेटघाट बन्द गरेको छ। हाल घाउको अवस्था सामान्य भएता पनि संक्रमणको जोखिम रहेको भन्दै अस्पतालले भेटघाट तत्कालका लागि रोक्ने निर्णय गरेको हो।
अस्पतालका मेडिकल निर्देशक डा. निजीना ताम्राकार र निर्देशक डा. किशण किशोर नकर्मीले संयुक्त विज्ञप्ति जारी गर्दै, "घाउको अवस्था ड्रेसिङ पछि मूल्यांकन गरिनेछ र यद्यपि स्थिति सामान्य देखिएको छ, संक्रमणको जोखिमका कारण भेटघाट अर्को सूचना नआएसम्म पूर्ण रूपमा बन्द गरिएको छ" भनेका छन्।
शनिबार पोखरा पर्यटन महोत्सवको उद्घाटनको क्रममा भएको एक दुर्घटनामा बेलुन पड्किँदा उपप्रधानमन्त्री पौडेल र नगर प्रमुख आचार्य घाइते भएका थिए। उनीहरूलाई उपचारका लागि सोही दिन पोखराबाट कीर्तिपुर अस्पताल ल्याइएको थियो।
