स्वास्थ्य तथा जनसंख्या मन्त्री प्रदीप पौडेलले कान्ति बाल अस्पताललाई एक हजार शैय्यामा विस्तार गर्न जापान सरकारसँग सहयोगको आग्रह गरेका छन्।
नेपालका लागि जापानी राजदूत तोरु मायदासँग हालैको भेटमा मन्त्री पौडेलले बालबालिकाको उपचारका लागि विशिष्ट अस्पताल भए पनि पर्याप्त पूर्वाधारको अभाव रहेको भन्दै जापान सरकारलाई आवश्यक सहकार्यका लागि अनुरोध गरेका हुन्।
भेटका क्रममा मन्त्री पौडेलले एक्सरे फिल्मको प्रयोग निरुत्साहित गरी डिजिटल वितरण प्रणालीलाई प्रवर्द्धन गर्ने सरकारको योजनामा पनि जापानको साथ आवश्यक रहेको बताए। जवाफमा राजदूत मायदाले नेपाल–जापान सम्बन्धलाई मजबुत बनाउने क्रममा अस्पताल विस्तार योजनामा सकारात्मक सहयोग रहने आश्वासन दिएका छन्।
मन्त्री पौडेलले कान्ति बाल अस्पतालको सेवा विस्तार गर्दै बढी क्षमतामा प्रभावकारी बाल उपचार उपलब्ध गराउने योजना अघि सारेका छन्। यस अभियानलाई सफल बनाउन विभिन्न क्षेत्रसँग सहकार्य र संवाद भइरहेको मन्त्रीको सचिवालयले जनाएको छ।
