नेकपा माओवादी केन्द्रका अध्यक्ष पुष्पकमल दाहाल प्रचण्ड काठमाडौं महानगरपालिकाका मेयर बालेन्द्र शाह (बालेन) को पुर्ख्यौली घर महोत्तरी पुगेका छन् ।
प्रचण्डसहितका माओवादी नेताहरु आज (बिहीबार) बिहान महोत्तरीको एकडारा गाउँपालिकामा रहेको मेयर शाहको घरमा पुगेका हुन् । शाहको त्यस घरमा हाल एकडारा गाउँपालिकाले भाडामा लिएर कार्यालय सञ्चालन गरेको छ ।
मेची महाकाली तराई-मधेस जागरण अभियानअन्तर्गत माओवादीले आज महोत्तरीस्थित शाहको घरमा कार्यक्रम गरेको छ । त्यहाँ आयोजित कार्यक्रमलाई सम्बोधन गर्दै प्रचण्डले सबै मिलेर व्यवस्था जोगाउन र देश बनाउन आग्रह गरे ।
उनले एकथरी मानिसहरु प्राप्त उपलब्धि उल्ट्याउने प्रयास गरिरहेको भन्दै त्यसको विरुद्ध एकजुट हुनुपर्ने बताएका हुन् । उनले मिटरब्याज पीडितहरुको समस्या माओवादीले मात्र समाधान गर्न सक्नेसमेत दाबी गरे ।
प्रचण्डले भने, ‘बालेनजीले पनि सुनिरहनुभएको होला । हामी सबै मिलेर यो देश बनाउनु छ ।’ उनले बालेनको घरमा आयोजित कार्यक्रममा सहभागी हुन पाउँदा रमाइलो महसुस भएको बताए ।
