काठमाडौं, फागुन ३० :
नेपाल बिमा प्राधिकरणले आगामी २०८२ वैशाख १ गतेदेखि ललितपुरको कुपन्डोलस्थित प्राधिकरणको केन्द्रीय कार्यालय भवनमा बिमा दाबीसम्बन्धी उजुरीहरूको सुनुवाइ गर्ने प्रयोजनका लागि इजलास सञ्चालन गर्ने भएको छ ।
प्राधिकरण सञ्चालक समितिको यही २०८१ फागुन २७ गते बसेको बैठकले मिति आगामी वैशाख १ गतेदेखि लागु हुने गरी प्राधिकरणमा दायर भएका बिमा दाबीसम्बन्धी उजुरीहरूको सुनुवाइ गर्ने प्रयोजनका निम्ति प्राधिकरणको भवनमा इजलास सञ्चालनका लागि भौतिक व्यवस्था तथा अन्य आवश्यक तयारी गर्न व्यवस्थापनलाई निर्देशन दिने निर्णय गरेको छ ।
यसैगरी, प्राधिकरण सञ्चालक समितिको बैठकले प्राधिकरणमा दायर भएका बिमा दाबी उजुरीहरूको हकमा साप्ताहिक तथा अन्य पेसी सूची र निर्णयहरू प्राधिकरणको वेबसाइटमा प्रकाशन गर्नसमेत व्यवस्थापनलाई निर्देशन दिने निर्णय गरेको छ ।
