काठमाडौं, जेठ १९ :
नेपाल महिला फुटबल टोली थाइल्यान्डसँग लगातार दोस्रो मैत्रीपूर्ण खेलमा पराजित भएको छ। सोमबार थाईल्यान्डको पथुम थानीस्थित थम्मासत रंगशालामा भएको खेलमा नेपाल २–० ले पराजित भयो।
पहिलो हाफमा गोलरहित बराबरीमा रोकिए पनि दोस्रो हाफमा नेपालले दुई गोल खायो। ५९औं मिनेटमा चात्चावान रोडथोङले ३५ यार्ड दूरीबाट फ्रिकिकमार्फत गोल गरिन्। त्यसपछि ७४औं मिनेटमा जिरापुरन मोङकोल्डीले अर्को गोल थप्दै थाइल्यान्डलाई जित दिलाइन्। यसअघि शुक्रबार ‘क्लोज डोर’मैत्री खेलमा पनि नेपाल १–० ले पराजित भएको थियो।
नेपालले यही जुन २९ देखि उज्वेकिस्तानमा सुरु हुने महिला एसियन कप छनोटको तयारीस्वरूप यी खेल खेलेको हो। छनोटमा नेपाल समूह ‘एफ’मा उज्वेकिस्तान, लाओस र श्रीलङ्कासँग प्रतिस्पर्धा गर्नेछ।
