नेपाली कांग्रेसका नेता डा. शेखर कोइरालाले राज्य सञ्चारमाध्यम र सञ्चारकर्मीप्रति अनुदार भएको आरोप लगाएका छन् । उनले अभिव्यक्ति स्वतन्त्रता र प्रेस स्वतन्त्रतामाथि राज्यबाट हुने प्रहारलाई अस्वीकार्य भन्दै कडा आपत्ति जनाएका छन् ।
नेता कोइरालाले सामाजिक सञ्जालमार्फत सरकारलाई चेतावनी दिँदै भनेका छन्, ‘सञ्चारमाध्यम र सञ्चारकर्मीप्रति अनुदार हुनु निरंकुशता बाहेक अरू केही हुनै सक्दैन ।’
उनको यस्तो टिप्पणी पत्रकार दिलभूषण पाठकविरुद्ध जारी प्रक्राउ पुर्जी र पछिल्ला दिनमा सञ्चारमाध्यममाथि देखिएको दवाबको सन्दर्भमा आएको हो ।
कोइरालाले सरकार कुशासनको दुश्चक्रमा फसेको आरोपसमेत लगाएका छन् ।उनले भने, ‘सरकार स्वयं आलोचनाको घेरामा रहँदा सञ्चार माध्यमलाई दवाबमा राख्न खोज्नु अस्वीकार्य हो ।’
नेता कोइरालाले यस्तो अवस्थाले लोकतन्त्रको मर्ममाथि नै प्रश्न उठाउने चेतावनी दिएका छन् ।
