विघटित प्रतिनिधिसभा पुनःस्थापनाको माग गर्दै नेकपा(एमाले) ले मुलुकभरका स्थानीय पालिकामा प्रदर्शन गरेको छ ।
मंगलबार एमालेको जनपरिचालन कार्यक्रम अन्तर्गत विभिन्न पालिकाहरुमा मोटरसाइकल र्यालीका साथै नारा जुलुस गरिएको छ । प्रतिनिधिसभा विघटनविरुद्ध एमालेले देशैभरि जनपरिचालन गर्ने निर्णय गरे अनुसार वडा, पालिका, जिल्ला र राष्ट्रिय रुपमा जनप्रर्दशनका कार्यक्रमहरु सार्वजनिक गरेको थियो ।
यसैक्रममा एमाले काठमाडौं महानगर कमिटीले काठमाडौंको बसन्तपुर क्षेत्रमा जनप्रदर्शन तथा सद्भाव र्याली निकालेको थियो । एमाले नेता आनन्दप्रसाद पोखरेलले प्रतिनिधिसभा विघटनविरुद्ध देशैभर प्रदर्शन गरेको जानकारी दिए ।
आफूहरुको प्रदर्शनलाई जागरण अभियानको रुपमा अघि बढाइएको उनले बताए । एमालले कात्तिक २९ गते जिल्लास्तर र आगामी मङ्सिर ६ गते काठमाडौँमा जनप्रदर्शन गर्ने तयारी गरेको छ ।
