पोखरेलले भने- ओलीको ठाउँमा आफू भएको भए आयोगले बोलाउनु अघि नै गएर बयान दिन्थे

नेकपा एमालेका वरिष्ठ उपाध्यक्ष ईश्वर पोखरेलले जाँचबुझ आयोगले बोलाउँदा पार्टी अध्यक्ष केपी शर्मा ओलीले बयान दिनै पर्ने बताएका छन्। एमालेको एघारौं महाधिवेशनको पूर्वसन्ध्यामा बुधबार आयोजित अन्तरसंवादमा उनले ओलीले आयोगले भनेको कुरा नमान्नु राम्रो नभएको बताए।

पोखरेलले भने, ‘म आफू ओलीको ठाउँमा भएको भए बोलाउनुभन्दा पहिले नै गएर बयान दिने थिएँ।’ उनले सरकारले बनाएको आयोगसँग केही कुरामा असहमति भए पनि आफ्ना तथ्य प्रस्तुत गर्न जानु स्वभाविक भएको पनि बताए ।

सरकारले बनाएको आयोगमा कतिपय कुरामा रिजर्भेसन भएको पोखरेलको भनाइ थियो । पोखरेलले स्पष्ट पारे, ‘तर बयान दिन जाने, विचार व्यक्त गर्ने, तथ्य प्रस्तुत गर्ने कुरालाई नकारात्मक रूपमा लिन हुँदैन। मलाई लाग्छ, हाम्रो अध्यक्ष पनि आयोगमा बयान दिन जानुहुन्छ।’