वीरगन्ज, पुस २० :
टिकटकमा एक-अर्काको धर्मलक्षित गरेर टिप्पणी गरेको विषयलाई लिएर धनुषाको कमला नगरपालिका-६ सखुवा मडानमा दुई समूहबीच तनाव बढेको छ।
सखुवा मरानस्थित मस्जिदमा तोडफोड भएको विरोधमा वीरगन्जमा आइतबार टायर बालेर नाराबाजीसहत प्रदर्शन भएको छ । वीरगन्जको छपकैया इदगाह चोकमा प्रदर्शनकारी र प्रहरीबीच सामान्य झडप पनि भएको छ। स्थिति नियन्त्रणमा लिन प्रहरीले हवाई फायर र ५ राउण्ड अश्रुग्यास प्रहार गरेको छ। त्यस क्रममा प्रहरीतर्फ सात जना सामान्य घाइते भएको पर्सा प्रहरी प्रवक्ता डिएसपी राजु कार्कीले बताए।
टिकटकमा भिडियो राख्ने र तोडफोडमा संलग्न आरोपमा तीन जनालाई नियन्त्रणमा लिइएको प्रहरीले जनाएको छ। सो घटनापछि धनुषा र पर्सासहित मधेशका जिल्लामा सुरक्षा सतर्कता बढाइएको छ ।
