नेपाली कांग्रेसका सभापति गगन थापाले सुनसरी लगायत देशका विभिन्न स्थानमा शान्ति र सद्भावका लागि सबै पक्षले आ आफ्नो क्षेत्रबाट प्रयत्न गर्नुपर्ने बताएका छन् ।
सुनसरी घटनालाई लिएर रास्वपा सभापति रवि लामिछानेले आज बोलाएको सर्वदलीय बैठकमा सभापति थापाले बैठकपछि सो कुरा बताएका हुन् ।
‘यो बेलामा निभाउनुपर्ने भूमिकाबारे जानकारी गराएका छौँ । अरू दलका नेताहरूले पनि सोही कुरा राख्नुभएको छ सभापति थापाले भने,‘धार्मिक सहिष्णुता र सामाजिक सद्भाव नेपाली समाजको अन्तर्निहित शक्ति हो यो कसैले दिएको वरदान होइन ।’
उनले वर्षौँदेखि नेपालका नागरिकहरूले समुदायको साझा प्रयत्नबाट आर्जन गरेको पुँजी भएकाले धार्मिक सहिष्णुतालाई जोगाउनुपर्नेमा जोड दिएका छन् । ‘यसका निम्ति, आवेग र उत्तेजनामा नआई धैर्यता र संयमताका साथ संवाद गर्नुपर्छ भनेर आह्वान गरिरहेका छौ’, थापाले भने, ‘सार्वजनिक आह्वान मात्र होइन, पार्टीका जनप्रतिनिधिहरूलाई संवाद गरेर बैठक राख्न लगाएको जानकारी गराएका छौ । ’
उनले सद्भाव कायम गर्न आआफ्नो दलहरूले गरेको प्रयत्नलाई साझा प्रयत्नका रूपमा अघि बढाउँदै सामूहिक रूपमा सबै राजनीतिक दल, प्रशासन, प्रेसलाई समेत त्यसका लागि आह्वान गर्न प्रस्ताव गरेको बताए । थापाले यस्तो अवस्थामा सरकार के गर्दै छ ? भनेर प्रश्न गरेको बताए ।
‘हामीले सरकारलाई प्रश्न पनि गरेका छौ । सरकार कहाँ छ ?, के गर्दै छ ? सरकार बन्दुक,लाठी र स्ट्याटसमा मात्र भेटिनु हुँदैन ।’ सभापति थापाको भनाइ छ । आज रास्वपाका सभापतिले सुनसरी घटनाका बिषयमा छलफल गर्न सिंहदरबारमा सर्बदलिय बैठक डाकेका थिए ।
