प्रधानमन्त्री केपी शर्मा ओलीले सामाजिक सुरक्षा एउटा उन्नत अवधारणा र अभ्यास भएको बताउनुभएको छ ।
आज सातौँ सामाजिक सुरक्षा दिवसको अवसरमा शुभकामना दिदैँ प्रधानमन्त्री ओलीले सामाजिक सुरक्षा मानव जातिको भविष्यको सुरक्षा र सुरक्षाको सुनिश्चितता भएको बताउनुभएको छ।
उहाँले मानव जाति सचेत प्राणी भएको हुनाले आफ्नो सुरक्षाका लागि सदैव चिन्तित रहेको तर उपाय, तरिकाहरू पत्ता लगाउन र अवलम्बन गर्न लामो समयसम्म त्यति सफल नरहेको उदाहरण दिदैँ पछि कर्मचारीहरूको सञ्चयकोष, पेन्सनजस्ता कुराहरूबाट सुरक्षाको अवधारणाले केही मात्रामा आकार दिन थालेको उल्लेख गर्नुभयो ।
सरकार सामाजिक सुरक्षाको बृहत्तर र परिपूर्ण अवधारणालाई अगाडि बढाउन, व्यवस्थित ढङ्गले सञ्चालन गर्न र त्यसलाई पूर्णता दिन प्रतिबद्ध रहेको उहाँको भनाइ छ ।
प्रधानमन्त्री ओलीले भन्नुभयो, ‘‘अब कसैले अनाथ भएँ भन्नु पर्दैन । अनाथ हुनु दुःखको कुरा हो । तर अब अनाथ भएर मैले अभिभावकत्व पाइन् भन्ने स्थिति हुने छैन । मेरो रेखदेख गर्ने कोही छैन भन्ने अवस्था कसैको हुने छैन । मेरो सहारा कोही छैन भन्ने अवस्था पनि हुने छैन । त्यसका निम्ति राज्य छ र सरकार छ ।’’
उहाँले अहिलेको सरकार जनताको सरकार भएको बताउनुभयो । सामाजिक न्याय र समानता सहित समृद्धिको यात्रामा हिँडेको सरकार भएको उहाँको भनाइ छ ।
प्रधानमन्त्री ओलीले वर्तमान सरकार सामाजिक सुरक्षाको बृहत्तर र परिपूर्ण अवधारणालाई अगाडि बढाउन प्रतिबद्ध रहेको पनि बताउनुभएको छ ।
