कञ्चनपुर, माघ २१ :
शुक्लाफाँटा नगरपालिका- १२ का बमनुराम रानाको उखुबारीमा आगलागी हुँदा तीन लाख बढीको क्षति भएको छ ।
दश कट्ठा जग्गामा लगाइएको उखु जलेर नष्ट भएको छ । छिमेकी मोतिराम रानाले नजिकै रहेको आफ्नो बारीमा रहेका उखुका पात जलाउने क्रममा हिजो साँझ बमनुको बारीमा आगलागी भएको शुक्लाफाँटा- १२ वडाध्यक्ष नवलसिंह रानाले बताए ।
हावा चलिरहेका बेला उखुका पात जलाउँदा उखुबारीमा आगो सल्केर पूरै बारीको उखु जलेको हो । झण्डै पाँच सय क्विन्टल काट्नका लागि ठिक्क भएका उखु जलेका हुन् । पीडित बमनुले समूहबाट कर्जा लिएर रोपेको पूरै उखु जलेर सखाप भएको बताए ।
