अमेरिकी राष्ट्रपति डोनाल्ड ट्रम्प नेतृत्वको प्रशासनले भुटानसहित ४३ देशका नागरिकलाई अमेरिका यात्रामा प्रतिबन्ध लगाउने तयारी गरेको छ।
ट्रम्प प्रशासनले जारी गरेको सूचनाका अनुसार दक्षिण एसियाका अफगानिस्तान र भुटानका नागरिकलाई पूर्णरूपमा अमेरिका यात्रामा रोक लगाइने छ। अमेरिकाको ‘रेड लिस्ट’मा अफगानिस्तान, भुटान, क्युबा, इरान, लिविया, उत्तर कोरिया, सोमालिया, सुडान, सिरिया, भेनेजुयला र येमेन परेका छन्, जसका नागरिकलाई अमेरिका प्रवेशमा पूर्णरूपमा प्रतिबन्ध लगाउने योजना बनाइएको छ।
त्यस्तै, ‘ओरेन्ज लिस्ट’मा रहेका बेलारुस, इरिट्रिया, हाइटी, लाओस्, म्यानमार, पाकिस्तान, रुस, सेरा लियोन, दक्षिण सुडान र तुर्कमेनिस्तानका नागरिकमाथि आंशिक यात्रा प्रतिबन्ध लाग्न सक्ने उल्लेख गरिएको छ।
अमेरिकी प्रशासनले जारी गरेको ‘एलो लिस्ट’मा अङ्गोला, कम्बोडिया, क्यामरुन, कङ्गो, लाइबेरिया, माली, जिम्बाब्वेसहित २२ देश रहेका छन्, जसका नागरिकलाई थप कडाइका साथ प्रवेश दिने नीति बनाउने तयारी गरिएको छ।
अन्तर्राष्ट्रिय सञ्चारमाध्यमहरूका अनुसार ट्रम्प प्रशासनले आप्रवासन नीति कडा पार्ने अभियानअन्तर्गत यात्रा प्रतिबन्धको सूची सार्वजनिक गर्न लागेको हो।
