व्यवस्था जोगाउन सबै जिम्मेवारीपूर्वक लागौं : नेतृ झाँक्री

नेकपा (एकीकृत समाजवादी) नेतृ रामकुमारी झाँक्रीले गणतन्त्रमाथि अहिले उठिरहेका प्रश्नप्रति असन्तुष्टि जनाएकी छन्।

शनिबार ललितपुरमा आयोजित कार्यक्रममा उनले १८ वर्षको अभ्यास र १० वर्षअघि संविधान जारी भइसकेको सन्दर्भमा अहिले गणतन्त्रमाथि प्रश्न उठ्नु गम्भीर विषय भएको बताइन्।

उनले भनिन्, ‘गणतन्त्रमा प्रश्न उठ्ने समय नै थिएन। तर त्यो व्यवस्था ल्याउँदा हामीले गरेका प्रतिबद्धताका बुझाइ एउटै थिएनन्। गणतन्त्रलाई विवादित बनाइयो।’ उनले कामभन्दा सपना बाँड्नमै धेरै समय खर्चिएको भन्दै व्यवस्था जोगाउन सबैले जिम्मेवारीपूर्वक भूमिका निर्वाह गर्नुपर्ने धारणा राखिन्।