खगेन्द्रप्रसाद र रुद्रकलीलाई सौराहाबाट बिदाइ

चितवन राष्ट्रिय निकुञ्जमा हुर्केका खगेन्द्रप्रसाद र रुद्रकली हात्तीलाई कतार पठाइँदै छ। सोमबार सौराहामा विधिवत् कार्यक्रम गरेर दुवै हात्तीलाई  बिदाइ गरिएको छ।

२०८१ वैशाखमा कतारका अमिर शेख तमिम बिन हमाद अल थानीको नेपाल भ्रमणका क्रममा नेपालले दुई वटा हात्ती उपहार दिने घोषणा गरेको थियो। सोही निर्णयअनुसार यी हात्ती अब कतारको अलखोर चिडियाखानामा रहनेछन्।

सौराहाबाट ११ किलोमिटर टाढा खैरहनीमा तयार गरिएको विशेष खोरसहित हात्तीलाई भैरहवास्थित लुम्बिनी अन्तर्राष्ट्रिय विमानस्थल पुर्‍याइएको छ। बुधबार भैरहवामा विशेष कार्यक्रमपछि चार्टर विमानमार्फत कतार पठाइने निकुञ्जले जनाएको छ। हात्तीका माहुते र पशु स्वास्थ्य प्राविधिक पनि एक महिनाका लागि कतार जानेछन्।