काठमाडौं, पुस ४ :
नेकपा एमालेले केन्द्रीय कमिटीबाट बिदा भएका सदस्य तथा पदाधिकारीहरू समेटेर केन्द्रीय सल्लाहकार परिषद् गठन गर्ने निर्णय गरेको छ।
शुक्रबार काठमाडौंमा सम्पन्न नवनिर्वाचित केन्द्रीय कमिटीको पहिलो बैठकमा महासचिव शंकर पोखरेलले सो जानकारी गराएका हुन्।
यस्तै एमालेले संशोधित विधान एक साताभित्र सम्पादन तथा प्रकाशन गर्ने पनि निर्णय गरेको छ। दोस्रो विधान महाधिवेशनबाट संशोधित विधान र राष्ट्रिय महाधिवेशनले गरेको संशोधनसमेत समेटेर विधान प्रकाशन गर्ने प्रस्ताव महासचिव पोखरेलले केन्द्रीय कमिटी बैठकमा पेस गरेका हुन्।
त्यसैगरी, नवनिर्वाचित पदाधिकारी तथा केन्द्रीय सदस्यहरूलाई जिम्मेवारी प्रदान गर्ने अधिकार केन्द्रीय सचिवालयलाई दिने प्रस्ताव पनि बैठकमा प्रस्तुत गरिएको छ। एमालेको दोस्रो केन्द्रीय कमिटी बैठक आगामी पुस २७ देखि २९ गतेसम्म हुने भएको छ ।
