नेकपा एमालेका अध्यक्ष केपी शर्मा ओलीले सरकारले वातावरण बनाए चुनावमा जान आफ्नो पार्टी तयार रहेको बताएका छन्।
११ औं महाधिवेशनका स्वयंसेवकहरुलाई धन्यवाद तथा प्रमाणपत्र वितरण गर्न बिहीबार काठमाडौंमा आयोजित कार्यक्रममा उनले प्रधानमन्त्री र राष्ट्रपतिले चुनावको कुरा गरे पनि वातावरण नबनेको बताए।
अध्यक्ष ओलीले राष्ट्रपति रामचन्द्र पौडेलसँग भएको भेटमा पनि एमाले चुनावको विरोधी नभएको कुरा राखिएको जानकारी दिए। उनले एमाले स्वतन्त्र र धाँधलीरहित चुनाव चाहन्छ भन्दै कुनै पनि परिस्थितिका लागि तयार रहेको बताए ।
‘सरकारले निर्वाचनको वातावरण बनायो भने हामी चुनावमा जान्छौँ,’ओलीले भने, ‘हामी चुनाव जितेर बहुमत ल्याउँछौँ। स्वतन्त्र र निष्पक्ष चुनाव हुनुपर्छ।’
प्रतिनिधिसभा पुनर्स्थापनाको विषय अदालतमा रहेको भन्दै ओलीले अदालतको निर्णय स्वीकार गरिने बताए।
‘अहिले पनि आक्रमण भइरहेका छन्। नेताहरूलाई हिँडडुल गर्न दिइएको छैन,’ उनले भने, ‘यस्तो अवस्थामा कसरी चुनाव सम्भव हुन्छ?’
ओलीले शान्त र सुरक्षित वातावरण बिना निष्पक्ष चुनाव हुन नसक्ने बताए।
