१३औं ‘राष्ट्रिय टोपी दिवस’ मनाइयो [फोटोसहित]

‘नेपाली टोपी: हाम्रो पहिचान’भन्ने मूल नाराका साथ आज देशभर राष्ट्रिय पोसाक र टोपी दिवस हर्षोल्लासका साथ मनाइएको छ।

काठमाडौँको वसन्तपुर दरबार क्षेत्रमा भेला भएर  मौलिक बाजागाजासहित नाचगान गर्दै उनीहरूले नेपाली पहिचान झल्काउने पोसाक लगाएर यस दिवसलाई उत्सवको रूपमा मनाएका छन्।

कार्यक्रममा सहभागीहरू मौलिक नेपाली पोसाक—दौरा-सुरुवाल, ढाका टोपी र गुन्यु-चोलीमा सजिएका थिए। हरेक वर्ष जनवरी १ तारिखलाई ‘टोपी दिवस’ का रूपमा मनाउने गरिएको छ । 

सहभागीहरूले एक-अर्कालाई नयाँ वर्षको शुभकामना आदान-प्रदान गरे । नेपाली पहिचानलाई विश्वभर चिनाउन यस्ता कार्यक्रम फलदायी हुने विश्वास व्यक्त गरे।

नेपाली मौलिक पहिचानका प्रतीक मानिने राष्ट्रिय पोसाकको संरक्षण र प्रवर्द्धन गर्ने उद्देश्यले वि.सं. २०७० देखि यो अभियान सुरु गरिएको हो।