विमानस्थलभित्रको डस्टबिनमा सुन : निकालेर लैजाँदै गरेका एक कर्मचारी पक्राउ

त्रिभुवन अन्तर्राष्ट्रिय विमानस्थलभित्रको डस्टबिनबाट सुन निकालेर लैजाँदै गरेका एक कर्मचारी पक्राउ परेका छन्। मंगलबार बिहान साढे सात बजेतिर विमानस्थलभित्र सरसफाइको काममा संलग्न डिकबहादुर राउतलाई पक्राउ गरिएको हो। फोहोर जम्मा गरिएको प्लास्टिकको थैलोबाट उनले सुन निकाल्दै गरेका थिए । उनी ४ दशमलव ४ ग्राम सुनसहित पक्राउ परेका हुन्।

प्रहरीका अनुसार उनी १५ वर्षभन्दा लामो समयदेखि विमानस्थलभित्र काम गर्दै आएका थिए।  डस्टबिनमा सुन कसरी आयो भन्ने बारेमा अनुसन्धान भइरहेको छ। पक्राउ परेका कर्मचारीलाई प्रहरीले थप अनुसन्धानका लागि भन्सार विभागमा जिम्मा लगाएको छ।