रास्वपाले चुनावी अभियानमा प्रयोग गरेको गाडीको ठक्करबाट रौतहटमा एक बालिकाको मृत्यु

चुनाव प्रचारप्रसारका निम्ति रास्वपाले प्रयोग गरिएको गाडीको ठक्करबाट ४ वर्षीया बालिकाको मृत्यु भएको छ । रौतहट क्षेत्र नम्बर २ का रास्वपा उम्मेदवार शेख सगिरको चुनावी प्रचारमा हिँडेको गाडीले बिहीबार ठक्कर दिँदा ४ वर्षीया बालिकाको मृत्यु भएको थियो ।  

रास्वपा उम्मेदवार सगिर मठिया गाउँमा घरदैलो गरिरहेका बेला कारले बा १५ च ४२४४ नम्बरको कारलेबालिकालाई ठक्कर दिएको प्रहरीले जनाएको छ । ठक्करबाट गम्भीर घाइते बालिकालाई उपचारका लागि सुरुमा सिटी अस्पताल गौरमा ल्याएका थिए । 

त्यसपछि बालिकालाई थप उपचारका लागि प्रादेशिक अस्पताल गौर लगिएको थियो ।घाइते बालिकालाई अस्पताल छाडेर फरार चालकलाई बेलुका प्रहरीले नियन्त्रणमा लिएको छ ।

यसैबीच,रास्वपाले यस घटनाप्रति गहिरो दुःख व्यक्त गर्दै छानबिनमा प्रशासनलाई पूर्ण सहयोग गर्ने जनाएको छ। महामन्त्री कविन्द्र बुर्लाकोटीद्वारा आज जारी विज्ञप्तिमा पीडित परिवारलाई हुन सक्ने राहत र सहयोगका लागि पार्टीबाट आवश्यक पहल भइरहेको उल्लेख छ । 

पार्टीले पीडित परिवारलाई राहत र न्याय दिलाउन कुनै कसर बाँकी नराख्ने प्रतिबद्धता जनाएको छ । सवारीसाधन परिचालनमा उच्च सतर्कता अपनाउन आफ्ना सदस्य तथा चालकलाई निर्देशन दिएको छ।