.jpg)
वैकल्पिक राजनीतिको नारासहित उदाएको राष्ट्रिय स्वतन्त्र पार्टी (रास्वपा) आफ्नो पहिलो ऐतिहासिक राष्ट्रिय महाधिवेशनको आन्तरिक तयारीमा होमिएको छ। पार्टीको केन्द्रीय निर्वाचन आयोगको जेठ ६ गतेको निर्णयअनुसार महाधिवेशनलाई प्रविधिमैत्री र व्यवस्थित बनाउन 'काउन्टडाउन' सुरु गर्दै विस्तृत कार्यतालिका सार्वजनिक गरिएको छ।
केन्द्रीय निर्वाचन आयोगका उपप्रमुख राम गुरुङका अनुसार पार्टीले ७७ वटै जिल्ला र सातै प्रदेशमा सांगठनिक तथा निर्वाचन प्रक्रियालाई तीव्र पारेको छ।
महाधिवेशन तयारीको 'टाइमलाइन': कुन काम कहिलेसम्म?
पार्टीले तल्लो तहदेखि केन्द्रसम्मको निर्वाचन र प्रतिवेदन बुझाउने समयसीमा (डेडलाइन) यसरी तोकेको छ:
जेठ १० गतेभित्र: जिल्ला र प्रदेशले निर्वाचन समिति गठनको आधिकारिक परिपत्र र माइन्युटको प्रतिलिपि बुझाउनुपर्ने।
जेठ १५ गतेभित्र: ७७ वटै जिल्ला र ७ प्रदेशमा अनिवार्य रूपमा निर्वाचन समिति गठन गरिसक्नुपर्ने।
जेठ २० गतेभित्र: स्थानीय तथा जिल्ला अधिवेशनका प्रतिवेदनहरू संकलन गरिसक्नुपर्ने।
जेठ २५ गतेभित्र: महाधिवेशनमा भाग लिने प्रतिनिधिहरूको नामावली केन्द्रमा पेस गरिसक्नुपर्ने।
जेठ मसान्तभित्र: जिल्ला सभापतिहरूले जिल्ला अधिवेशन तथा निर्वाचन प्रतिवेदन अनिवार्य बुझाउनुपर्ने।
असार ५ गतेभित्र: प्रदेश अधिवेशनबाट निर्वाचित पदाधिकारीहरूको विवरण पेस गरिसक्नुपर्ने।
महाधिवेशनमा 'डिजिटल' ट्विस्ट: ई-भोटिङको तयारी
परम्परागत मतपत्रको झन्झटलाई विस्थापित गर्दै रास्वपाले आफ्नो पहिलो महाधिवेशनलाई आधुनिक र प्रविधिमैत्री बनाउने भएको छ। यसका लागि महाधिवेशनमा इलेक्ट्रोनिक भोटिङ मेसिन (EVM) प्रयोग गर्ने तयारी गरिएको छ। यसबारे प्राविधिक छलफल र आवश्यक तयारी असार ५ गतेभित्रै टुङ्ग्याइने पार्टीले जनाएको छ।
केन्द्रको कडा निर्देशन: 'समयमै काम सक्नु'
निर्वाचन आयोगले सातै प्रदेशका सभापतिहरूलाई आफ्ना मातहतका जिल्ला सभापतिहरूसँग चुस्त समन्वय गर्न निर्देशन दिएको छ। केन्द्रले तोकेको 'डेडलाइन' भित्रै सम्पूर्ण कार्य सम्पादन गर्न कडा परिपत्र जारी गरिएको छ।
महाधिवेशनको यो भित्री तयारीलाई व्यवस्थित र प्रभावकारी बनाउन पार्टीका महामन्त्रीद्वय कविन्द्र बुर्लाकोटी र भूपदेव शाहका साथै संगठन विभागका सचिव शंकर श्रेष्ठलाई समेत जिम्मेवारीसहित बोधार्थ दिएर आन्तरिक परिचालन तीव्र पारिएको छ।
