बागमती प्रदेश प्रमुख दीपकप्रसाद देवकोटाले नयाँ सरकार गठन प्रक्रिया सुरु गरेका छन् । इन्द्रबहादुर बानियाँले सोमबार मुख्यमन्त्रीबाट राजीनामा दिएपछि प्रदेश प्रमुख देवकोटाले नयाँ मुख्यमन्त्री नियुक्त गर्ने प्रयोजनका लागि दाबी पेस गर्न आहृवान गरेका छन् ।
संविधानको धारा १६८ को उपधारा २ बमोजिम प्रदेश सभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई बिहीबार अपरान्ह ४ बजेसम्म मुख्यमन्त्रीका लागि दाबी पेस गर्न आह्वान गरिएको छ । नेकपा एमाले र नेपाली कम्युनिस्ट पार्टीबीच भएको सहमति अनुसार बागमतीमा अब एमालेले सरकारको नेतृत्व गर्ने छ ।
नेकपा र एमालेबीचको गठबन्धनले अन्य दलको समर्थन जुटाएर सरकार गठन गर्ने तयारी गरेका छन् । एमालेले मुख्यमन्त्रीका रुपमा कसलाई अघि सार्ने भन्ने विषय भने अहिलेसम्म टुंगिएको छैन ।
