नेकपा माओवादी केन्द्रको आठौं केन्द्रीय समितिको छैटौं बैठकको दोस्रो दिनको छलफल सकिएको छ ।
बैठकमा नेताहरुको सम्पत्ति छानबिनको माग उठेको छ । पार्टीका नेताहरूको कार्यशैली भड्किलो भएको, आयस्रोत अपादर्शी भएको भन्दै केन्द्रीय सदस्यहरूले नेताहरूको सम्पत्ति छानबिन गर्नुपर्ने माग गरेका हुन् ।
अध्यक्ष पुष्पकमल दाहालले आइतबार बैठकमा प्रस्तुत गरेको राजनीतिक प्रतिवेदनमा मूलभूत पक्षको सबैबाट समर्थन गर्दै यसलाई कार्यान्वयनमा कडाइ गर्न जोड दिएका छन् । नेताहरूले समाजवादी क्रान्तिको स्पष्ट मार्गचित्र माग, स्थानीय तहबाट समाजवादको कार्यान्वयन थाल्ने प्रस्ताव स्वागतयोग्य भए पनि त्यसको खाका बनाउन आग्रह गरेका छन् ।
केही सदस्यले पार्टीको महाधिवेशन तालिका ल्याउन आग्रहसमेत गरेका छन् । दाहालले आफ्नो राजनीतिक प्रतिवेदनमा ६ महिने अभियान चलाएपछि महाधिवेशनमा जान सकिने प्रस्ताव गरेका छन् । आज (सोमबार) बैठकको प्रारम्भमा अध्यक्ष दाहालले संक्षिप्त धारणा राखेपछि राजनीतिक प्रस्तावमा छलफल सुरु भएको थियो ।
बैठकमा १८० जनाले बोल्नका लागि नाम टिपाएकामा आज (सोमबार) ८० जनाले बोलेको अध्यक्ष दाहालको सचिवालयले जनाएको छ । बैठक भोलि (मंगलबार) बिहान ११ बजेसम्मा लागि स्थगित भएको छ ।
